Azərbaycanda mebellərin fabrik yığımı və ixracı ilə məşğul olan "Embawood”, “Saloglu”, “Foriella”, “Rattan bağ mebelləri” kimi iri şirkətlər fəaliyyət göstərir. Bu şirkətlər həm yerli əhalini mebel avadanlıqları ilə təmin edir, həm də Gürcüstana, Qazaxıstana, Qırğızıstana, Türkmənistana, İrana, o cümlədən Rusiyaya mebeli ixracı həyata keçirirlər.

İlin əvvəllərində Azərbaycanda mebel istehsalı və ixracı ilə bağlı gözləntilər ümidverici olsa da, ölkədə pandemiyanın yayılması müxtəlif biznes sahələri kimi bu istiqamətdə də təsirlənməni qaçılmaz etdi.

Azərbaycan Mebel İstehsalçıları Assosiasiyasının sədri Məşhur Məmmədov verdiyi açıqlamasında bildirib ki, pandemiya ilə əlaqədar mebel istehsalı və satışında durğunluq yaşanır. Sədrin qeyd etdiyinə görə durğunluğun səbəbləri isə aşağıdakılardır:

"Mebel istehsal edən şirkətlər tamamilə bağlanmasalar da, fəaliyyətlərini müvəqqəti dayandırıblar. Buna səbəb ilk öncə onların işçilərinin bayramla əlaqədar rayonlarda olması, sonra isə karantin ilə bağlı satış mağazalarının bağlanılması oldu. Mebel şirkətlərinin satışları yalnız mağazalar vasitəsilə mümkündür. Mağazalar da bağlandığı üçün şirkətlər, demək olar ki, satış edə bilmədilər. Bu gün Azərbaycanda mebel istehsalı və satışının 70-75%-i toy mərasimləri ilə bağlıdır. Bu sahədə durğunluğun yaranmasının səbəblərindən biri də toy mərasimlərinin dayandırılmasıdır. Yəqin bu problemlər yaxın zamanda öz həllini tapacaq.

Digər problem isə Azərbaycanda mebel xammalının olmaması və xammalın xaricdən gətirilməsi ilə bağlıdır. Azərbaycana xammal ixrac edən ölkələrdə də pandemiya yaşandığına görə hazırda xammal təchizatı sahəsində problemlər var. Məhsulların çatdırılması ilə bağlı logistika sektorunda çətinliklər yaranıb. Yəqin ki, toylar və şadlıq evlərinin fəaliyyəti bərpa olduqdan sonra mebel sahəsində də işlər qaydasına düşəcək.

Logistika problemləri və digər ölkələrdə mağazaların bağlanması nəticəsində Azərbaycandan xaricə mebel çatıdırlması da problemlə qarşılaşıb. Bir neçə aydan sonra bu problemlər həll olacağı gözlənilir. Çox güman ki, iyun ayından sonra ixrac başlayacaq. Hələlik isə Azərbaycandan xaricə mebel ixracı tamamilə dayanıb".

Assosiasiya sədri dövlət dəstəyindən yararlanmaq məsələsinə də toxunub:

"Yaranmış çətinliklərlə əlaqədar dövlət tərəfindən mebel istehsalçılarına da əməkhaqlarla bağlı yardımlar edilib. Mebel istehsalçılarının heç biri işçi ixtisarına yol verməyib. Çünki heç bir müəssisə öz mütəxəssisini itirmək istəmir. Ona görə də maksimum dərəcədə hamısı işçilərini qoruyub saxlamağa çalışırlar. Aprel ayında dövlət tərəfindən bizə dəstək göstərilib. Ehtimal olunur ki, may ayında yenə belə bir dəstək olacaq".

M.Məmmədovun proqnozuna görə pandemiya xarici ölkələrdə mebel istehsalına zərbə vurduğu üçün Azərbaycanda yerli istehsala tələbat artacaq:

"Düşünürəm ki, bütün bu proseslər, pandemiyanın xarici istehsalçılar üçün də yaratdığı problemlər Azərbaycanda yerli istehsalın artmasına müsbət təsir göstərəcək. Çünki pandemiya ilə bağlı yaranan geriləmə tək bizdə deyil, Türkiyədə, Çində və digər mebel istehsal edən ölkələrdə də yaranıb. Bu geriliyin aradan qalxması müəyyən qədər vaxt aparacaq. Bu müddət isə bizdə yerli mebel istehsalına müsbət təsir göstərəcək, yerli məhsulların satılmasına səbəb olacaq ki, bu da istehsalın artmasına gətirib çıxaracaq. Ölkələrarası yollar açılandan sonra belə qırılan iqtisadi əlaqələrin bərpası zaman tələb edəcək. Bu zaman çərçivəsində yerli istehsalçılar öz bazar paylarını artıracaqlar".

©️ Report