ABŞ Qiymətli Kağızlar və Birjalar Komissiyası (SEC) spot "Ethereum ETF"-lərini emissiya edən şirkətlərə əməliyyat icazəsi verdi və ETH ETF-lərin ticarətinə başlanılmasına yol açdı.

Fins.az xəbər verir ki, SEC-in təsdiqi ilə ABŞ investorları indi spot mübadilə fondları vasitəsilə "Bitcoin"-dən sonra ikinci ən böyük kriptovalyuta aktivinə investisiya edə biləcəklər. SEC may ayında spot "Ethereum ETF"-ləri üçün ilkin təsdiq versə də, fondların fəaliyyətə başlaması üçün əlavə addımlar atmaq lazım gəldi. Keçən həftədən bəri SEC-in spot ETH ETF üçün tam təsdiq verəcəyi barədə şayiələr yayılırdı və nəhayət, təsdiq dünən ABŞ bazarının bağlanmasına yaxın elan edildi.

Yanvar ayındakı təsdiqdən sonra Bitcoin ETF-ləri böyük maraq gördü və milyardlarla dollar vəsait topladı. Analitiklər ETH ETF-lərinin də əhəmiyyətli miqdarda vəsait cəlb edəcəyini proqnozlaşdırırlar.

Dünənki təsdiqdən sonra "Ethereum" qiyməti 3,500$ həddindən bir qədər geriləyərək 3,425$-a düşdü. "Ethereum" qiymətində ciddi dalğalanma müşahidə edilməsə də, qiymətin ilin sonuna qədər 6,000-7,000$ aralığında qərarlaşa biləcəyi iddia edilir.