10 iyun 2024-cü il tarixində Bakı Fond Birjasında Kapital Bank-ın manat istiqrazlarının kapital bazarında ticarətə buraxılması münasibətilə Açılış Zəngi tədbiri keçirilmişdir.
Fins.az xəbər verir ki, ölkənin birinci bankı Kapital Bank kapital bazarında həm yerli, həm də xarici valyutada yeni maliyyə alətlərinin buraxılışını həyata keçirir. Daha öncə bank rəsmiləri 100 000 000 (yüz milyon) manat həcmində istiqrazın bazara buraxılacağı haqqında məlumat vermişdilər. 10 iyun 2024-cü il tarixində baş tutan Açılış zəngi tədbiri ilə bankın 50 000 000 (əlli milyon) manat həcmində istiqrazlarının yerləşdirilməsinə başlanıldı.
Tədbiri çıxış sözü ilə Bakı Fond Birjasının Baş Kommersiya inzibatçısı Oqtay Qasımov açaraq kapital bazarında əhalinin investisiyalarının artırılmasının önəmini vurğulayıb: “Bank sektorunun Kapital bazarları vasitəsilə maliyyələşməsi bazarın genişlənməsinə və inkişafına xidmət edir”. Kapital Bank-ın Xəzinadarlıq departamentinin direktoru Fərid Əliyev isə maliyyə bazarında investisiya alətlərinin çeşidlərinin artırılmasının əhəmiyyətindən danışıb. “Azərbaycan maliyyə bazarı yüksək inkişaf potensiallı bir mühitdir. Biz bu bazarın liderlərindən biri olaraq ölkəmizdə kapital bazarının maliyyə sistemində rolunu artırmaq və iqtisadi inkişafa töhfə vermək istəyirik. Hədəfimiz bazar infrastrukturunun inkişaf etdirilməsi, bazara olan etimadın gücləndirilməsi, bazara çıxış imkanlarının genişləndirilməsidir. Buna görə də biz həm xarici həm də yerli valyutada yeni maliyyə alətlərini təqdim edirik. Bu istiqamətdə istəklərimizdən biri də istiqrazları daha geniş investor kütləsinə çıxardaraq fiziki şəxslərin kapital bazarlarında iştirakını təşviq etməkdir. Bildiyiniz kimi Kapital Bank artıq 35 milyon ABŞ dolları həcmində istiqraz buraxılışını uğurla tamamlayıb. Və yerləşdirmədə ümumi həcmin 82%-dən çoxu fiziki şəxslərin payına düşüb. Bu, fiziki şəxslərin maliyyə bazarına cəlb edilməsi istiqamətində uğurlu nəticədir”.
PAŞA Kapital İnvestisiya Şirkətinin İdarə Heyəti sədrinin müavini Rauf Qurbanov çıxışında vurğulamışdır: “İnvestisiya imkanlarını dəyərləndirmək istəyən vətəndaşlar sahəsinin iki lideri - ölkənin ən böyük filial şəbəkəsinə malik bankı Kapital Bank və ən böyük bazar payına malik investisiya şirkəti PAŞA Kapital tərəfindən təqdim olunan etibarlı, rahat və sürətli xidmətdən faydalana biləcəklər. İstiqrazların alışını həyata keçirən investorlar bir ilkə imza atmaqla yanaşı, kapital bazarina öz töhfəsini vermiş olacaqlar”.
Xatırladaq ki, təklif edilən istiqrazların hər birinin nominal dəyəri 100 manat, illik faiz dərəcəsi 10%, ödəniş dövrü 30 gündən bir, tədavül müddəti 1 ildir. Sənədsiz, adlı, faizli, təmin edilməmiş istiqrazların yerləşdirmə üzrə anderrayteri “PAŞA Kapital İnvestisiya Şirkəti” QSC-dir.
Tədbirin sonunda emitent – Kapital Bank, Bakı Fond Birjası və PAŞA Kapital İnvestisiya Şirkətinin nümayəndələri tərəfindən istiqrazların ilkin bazarda ticarətə buraxılışını simvolizə edən zəng çalınıb. Beləliklə, istiqrazların Bakı Fond Birjasının ticarət platformasında ticarətinə başlanılıb.
Fuad Mədətov
Fins.az
