Bakı, 01dekabr Fins.az

Dekabrın 1-də keçirilməsi planlaşdırılan "OPEC+" (OPEC (Neft İxrac Edən Ölkələr Təşkilatı) və təşkilata daxil olmayan ölkələri əhatə edən neft hasilatının azaldılması üzrə təşəbbüs) ölkələrinin nazirlər toplantısı təxirə salınıb.

Fins.az-ın məlumatına görə, bu barədə TASS mənbələrinə istinadən xəbər verir.

Məlumata görə, görüş 3 dekabr tarixində, Bakı vaxtı ilə saat 17:00-da video-konfrans formatında keçiriləcək. İclasdan əvvəlki vaxt isə qeyri-rəsmi məsləhətləşmələr üçün istifadə ediləcək.

Qeyd edək ki, bundan əvvəl "OPEC+" ölkələri 2021-ci ilin ilk aylarında neft hasilatının hansı həcmdə azaldılması barədə bir fikir birliyinə gələ bilməmişdi. 30 noyabr və 1 dekabr tarixlərində bir sıra "OPEC+" ölkələri nazirlər səviyyəsində bir neçə iclas keçirəcək, nəticədə razılaşma çərçivəsində alyans tərəfindən 2021-ci ilin əvvəlindən etibarən gündəlik neft hasilatının 2 mln. barel artımının olub-olmaması barədə qərar verilməlidir. Aprel ayının 12-də "OPEC+" ölkələri  nazirlərinin 10-cu iclasında qəbul edilmiş tarixi razılaşma ümumilikdə gündəlik xam neft hasilatının may-iyunda 9,7 mln. barel, iyul-dekabrda 7,7 mln. barel, 2021-ci ildən 2022-ci ilin aprel ayının sonuna qədər 5,8 mln. barel azaldılmasını nəzərdə tuturdu.

(c)APA