Avropa Yenidənqurma və İnkişaf Bankı (AYİB) Azərbaycanın iqtisadiyyatı ilə bağlı proqnozunu 2025-ci il üçün 2% səviyyəsinə endirib. May ayında verilən proqnoz isə 2,1% idi. 2026-cı il üzrə proqnoz dəyişməyərək 2,5% olaraq qalır.

Finss.az AYİB-in məlumatına əsasən xəbər verir ki, Azərbaycanın iqtisadiyyatı 2023-cü ildə 1,4%, 2024-cü ildə isə 4,1% artıb. 2025-ci ilin ilk yarısında ÜDM artımı 1,5% təşkil edib.

Hesabata görə, 2025-ci ilin ilk yarısında karbohidrogen hasilatının 3,1% azalması iqtisadi artımın yavaşlamasına səbəb olub. Bununla belə, qeyri-neft sektoru – tikinti, ticarət və turizm – 3,8% artım göstərib. Hazırda qeyri-neft sektorları ÜDM-in üçdə ikisindən çoxunu təşkil edir.

İnflyasiya 2024-cü ildə 2,2% olub, lakin 2025-ci ilin yanvar-avqust ayları ərzində 5,6%-ə yüksəlib. Bu, ərzaq məhsulları və xidmətlərin bahalaşması ilə izah olunur. 2025-ci ilin iyulunda Azərbaycan Mərkəzi Bankı əsas uçot dərəcəsini 25 baza bəndi azaldaraq 7,0%-ə endirib və 2023-cü ilin sonundan bəri ümumi yumşaldılmanı 200 baza bəndinə çatdırıb.

Dövlət büdcəsi 2025-ci ilin birinci yarısında ÜDM-in 4,4%-i həcmində profisitlə icra olunub. Beynəlxalq ehtiyatlar (SOFAZ/ARDNF aktivləri daxil olmaqla) 78,8 milyard ABŞ dollarına çatıb və bu, üç ildən artıq idxalı ödəməyə kifayət edir.

“Moody’s” agentliyi 2025-ci ilin iyun ayında Azərbaycanın suveren reytinqini Baa3 səviyyəsinə yüksəldib.

AYİB qeyd edir ki, sabit qeyri-neft sektoru artımı neft-qaz sənayesindəki zəifləməni kompensasiya edəcək. Əsas risklər enerji resurslarının qiymətlərində dalğalanma, qlobal ticarətdə qeyri-müəyyənlik və regional geosiyasətlə bağlıdır. Bununla yanaşı, Aİ ilə enerji əməkdaşlığı, Orta Dəhlizin genişlənməsi və ABŞ tərəfindən dəstəklənən Ermənistanla sülh təşəbbüsü yeni ticarət marşrutlarının açılması və investor etimadının möhkəmlənməsi üçün imkanlar yaradır.