2025-ci ilin iyun ayının sonunadək ölkədə rezident maliyyə institutlarının emissiya etdiyi “MasterCard” ödəniş kartları vasitəsilə ümumilikdə 78,7 milyon əməliyyat aparılıb. Bu əməliyyatların ümumi həcmi isə 5,1 milyard manata çatıb.

Finss.az Azərbaycan Mərkəzi Bankının məlumatına əsasən xəbər verir ki, bu, ötən ilin eyni dövrü ilə müqayisədə ciddi artım deməkdir: əməliyyatların sayı 54 faiz, həcmi isə 1,3 milyard manat və ya 1,3 dəfə artıb.

Eyni zamanda, qeyri-rezident maliyyə institutlarının (yəni xarici bankların) verdiyi “MasterCard” kartları ilə Azərbaycanda 483,7 min əməliyyat icra olunub. Bu əməliyyatların ümumi dəyəri 48,8 milyon manat təşkil edib.

Maraqlıdır ki, əməliyyatların sayı cüzi – 2 faiz artsa da, ümumi məbləğdə 4,5 faiz azalma müşahidə edilib.

Xatırladaq ki, rezident kartlar dedikdə yerli banklar tərəfindən verilən, qeyri-rezident kartlar isə xarici banklar tərəfindən digər ölkələrdə yaşayan şəxslərə təqdim olunmuş ödəniş vasitələri nəzərdə tutulur. Bu kartlarla aparılan əməliyyatlar ölkə daxilində və xaricdə müxtəlif növ alış-veriş və xidmət ödənişlərini əhatə edir.

Fuad Mədətov
Finss.az