Azərbaycan Beynəlxalq Bankı kiçik və orta sahibkarları, eləcə də kənd təsərrüfatının inkişafını stimullaşdırmaq məqsədilə güzəştli şərtlərlə Aqro və Mikro kredit məhsulları təqdim edir.

Finss.az xəbər verir ki, mikro kreditlər, xüsusilə mikro biznes sahiblərinə qısa müddətdə bizneslərini inkişaf etdirmək və genişləndirmək imkanı verir.

Mikro kreditlər Azərbaycan Respublikasının Kənd Təsərrüfatı Nazirliyi yanında Aqrar Kredit və İnkişaf Agentliyinin vəsaiti hesabına maliyyələşdirilir. Kredit məbləği dövriyyə vəsaitinin artırılması üçün 20 min manatadək, kənd təsərrüfatı təyinatlı layihələr üçün isə 15 min manatadək təklif olunur. Mikro kreditlərin illik faiz dərəcəsi 19%-dən başlayaraq müəyyən edilsə də, kənd təsərrüfatı kreditlərində bu göstərici 12%-ə qədər azaldılır. Kredit müddəti hər iki halda 36 aya qədərdir və 12 ayadək güzəşt müddəti mövcuddur. Xidmət haqqı rəsmiləşdirmə zamanı 1% təşkil edir.

Kreditlərin əsas üstünlüklərindən biri girovun tələb olunmamasıdır, həmçinin müraciət edənlər kredit üçün eyni gündə müraciət edib, vəsaiti əldə edə bilərlər. Mikro kreditlərdən istifadə etmək üçün ABB-dən əmək haqqı və ya pensiya kartına malik olmaq və Azərbaycan vətəndaşı olmaq şərtdir.

Müraciətlər regionlara uyğun filiallar vasitəsilə həyata keçirilir. Müraciət edə biləcəyiniz filiallar arasında Yevlax, Bərdə, Ağcəbədi, Saatlı, Kürdəmir, İmişli, Sumqayıt, Göyçay, Şəmkir, Şamaxı, Şəki, Zaqatala, Mingəçevir, Tovuz və Ağdaş kimi şəhər və rayonlar yer alır. Hər rayon üçün müştərilər tabe olduqları region mərkəzi filialına müraciət edə bilərlər.

ABB-nin bu kredit məhsulu sahibkarlara bizneslərini sürətləndirmək və kənd təsərrüfatı sahəsində inkişaf yaratmaq üçün əlverişli maliyyə dəstəyi təqdim edir.

Ətraflı məlumat üçün keçid: //abb-bank.az/az/kicik-ve-orta-biznes/biznes-kreditleri/mikro-kredit

Fuad Mədətov
Finss.az