Finss.az - Asiya İnkişaf Bankı (AİB) 2025-ci il üzrə Azərbaycan üçün inflyasiya proqnozunu 0,4 faiz bəndi artıraraq 4,2%-ə çatdırıb.

Bu barədə Bankın son açıqlamasında bildirilir.

AİB-nin hesablamalarına görə, 2026-cı il üçün isə inflyasiya göstəricisi 3,5% səviyyəsində proqnozlaşdırılıb.

Qurum qeyd edir ki, inflyasiyadakı artım əsasən daxili tənzimlənən tariflərin yüksəlməsi ilə əlaqədardır:

“2024-cü ilin iyun ayında tənzimlənən yanacaq qiymətlərinin artırılması digər daxili qiymətlərə də təsir göstərməyə davam edir. Bundan əlavə, 2025-ci ilin yanvarında su, elektrik enerjisi və digər kommunal xidmətlərin tariflərinin artması inflyasiya təzyiqlərini gücləndirib.”

Azərbaycan Mərkəzi Bankı isə qiymət artımlarını nəzarətdə saxlamaq məqsədilə 2024-cü ilin mayından bəri əsas faiz dərəcəsini 7,25% səviyyəsində sabit saxlayır. Bank inflyasiyanın 2%–6% hədəf diapazonunda qorunmasına çalışır.

AİB həmçinin xəbərdarlıq edir ki, 2025-ci ildə qlobal tarif dəyişiklikləri və idxal qiymətlərinin yüksəlməsi inflyasiyaya əlavə təzyiqlər yarada bilər. Buna qarşılıq, 2026-cı ildə daha zəif iqtisadi artım və əvvəlki inzibati qiymət artımlarının təsirinin azalması inflyasiyanın enməsinə səbəb ola bilər.

Bankın bölgə üzrə proqnozlarına əsasən, Qafqaz və Mərkəzi Asiyada 2025-ci ildə inflyasiya 6,9%, 2026-cı ildə isə 5,9% təşkil edəcək.