"Ziraat Bank Azərbaycan" ASC 2024-cü ilin yanvar-sentyabr dövrünü 11 milyon 294 min manat xalis mənfəətlə tamamlayıb. Bu, 2023-cü ilin eyni dövründəki 6 milyon 414 min manat xalis mənfəətlə müqayisədə 4 milyon 880 min manat və ya 76% artım deməkdir.

Gəlirlər

Fins.az Bankın rüblük hesabatlarına istinadən xəbər verir ki, "Ziraat Bank Azərbaycan"ın faiz gəlirləri 2023-cü ilin 9 ayında 34 milyon 375 min manat ikən, 2024-cü ilin 9 ayında bu rəqəm 39 milyon 332 min manata yüksəlib. Bu, 4 milyon 957 min manat və ya 14,4% artım deməkdir. Eyni zamanda, bankın qeyri-faiz gəlirləri 2 milyon 699 min manat və ya 24,6% artaraq 13 milyon 667 min manata çatıb.

Gəlirlərin artması ilə əlaqədar olaraq, bankın əməliyyat mənfəəti 5 milyon 415 min manat artaraq 23 milyon 437 min manat təşkil edib.

Aktivlər və Kredit Portfeli

2023-cü ilin sonu ilə müqayisədə 2024-cü ilin 9 ayı ərzində "Ziraat Bank Azərbaycan"ın kredit portfeli 53 milyon 536 min manat və ya 13,7% artaraq 444 milyon 478 min manata çatıb. Bankın cəmi aktivləri isə 168 milyon 272 min manat və ya 26,4% artaraq 804 milyon 9567 min manat olub.

Depozitlər

2023-cü ilin sonu ilə müqayisədə 2024-cü ilin 9 ayı ərzində "Ziraat Bank Azərbaycan"da depozitlər 140 milyon 577 min manat və ya 34,2% artaraq 551 milyon 998 min manata qalxıb. Bu artım həm fiziki, həm də hüquqi şəxslərin depozitlərinin artması ilə əlaqədardır.

Məcmu Kapital

30 sentyabr 2024-cü il tarixinə "Ziraat Bank Azərbaycan" ASC-nin məcmu kapitalı 123 milyon 854 min manat olub. Bu, 2023-cü ilin sonunda 111 milyon 601 min manat məcmu kapitala malik olduğu ilə müqayisədə artım göstərir.

Fuad Mədətov
Fins.az