Dövlət bankı "Azər-Türk Bank" ASC 2024-cü ilin yanvar-sentyabr aylarını 18 milyon 371 min manat xalis mənfəətlə tamamlayıb. 2023-cü ilin eyni dövründə bankın xalis mənfəəti 10 milyon 499 min manat olmuşdu. Beləliklə, bankın xalis mənfəəti 7 milyon 872 min manat və ya 75% artıb.

Əməliyyat Gəlirləri

Fins.az-ın bankın rüblük hesabatlarına istinadən verdiyi məlumata görə, "Azər-Türk Bank"ın faiz gəlirləri 2023-cü ilin 9 ayında 45 milyon 593 min manat olduğu halda, 2024-cü ilin 9 ayında bu rəqəm 76 milyon 666 min manata çatıb. Bu, 31 milyon 73 min manat və ya 68,1%-lik artım deməkdir. Bankın qeyri-faiz gəlirləri isə 7 milyon 733 min manat və ya 35% artaraq 29 milyon 801 min manat olub.

2024-cü ilin 9 ayında "Azər-Türk Bank"ın ümumi əməliyyat gəlirləri (faiz və qeyri-faiz gəlirləri) 106 milyon 467 min manat, ümumi əməliyyat xərcləri isə 79 milyon 543 min manat təşkil edib. Nəticədə, bankın əməliyyat mənfəəti 26 milyon 924 min manat olub. Bu mənfəətdən 3 milyon 930 min manat mümkün zərərlər üçün ehtiyatlara ayrılıb, 4 milyon 623 min manat isə mənfəət vergisi ödənilib.

2023-cü ilin eyni dövründə "Azər-Türk Bank"ın əməliyyat mənfəəti 16 milyon 743 min manat idi. Beləliklə, bankın əməliyyat mənfəəti 10 milyon 181 min manat və ya 60,8% artıb.

Kredit Portfeli və Aktivlər

2023-cü ilin sentyabr ayı ilə müqayisədə 2024-cü ilin sentyabr ayı ərzində "Azər-Türk Bank"ın kredit portfeli 344 milyon 407 min manat və ya 79,2% artaraq 779 milyon 326 min manata çatıb. İstehlak kreditləri portfeli 63 milyon 259 min manat artaraq 284 milyon 17 min manata, biznes kreditləri isə 262 milyon 712 min manat artaraq 306 milyon 83 min manata yüksəlib. İpoteka kreditləri də 18 milyon 437 min manat artaraq 189 milyon 227 min manata çatıb.

2024-cü ilin sentyabr ayı ərzində bankın cəmi aktivləri 1 milyard 548 milyon 469 min manata yüksəlib, bu isə 2023-cü ilin sentyabr ayı ilə müqayisədə 685 milyon 140 min manat və ya 79,4% artım deməkdir. Bankın depozitləri isə 84,6% artaraq 1 milyard 444 milyon 716 min manata çatıb, bu artımın böyük hissəsi hüquqi şəxslərin depozitləri hesabına baş verib.

Məcmu Kapital

2024-cü ilin sentyabr ayının sonunda "Azər-Türk Bank" ASC 96 milyon 268 min manat məcmu kapitala malik olub. 2023-cü ilin sonunda isə bu rəqəm 78 milyon 437 min manat idi.

Fuad Mədətov
Fins.az