ABŞ-da qalmaqal: Adi telefon Uoll-stritdəki peşəkar terminallardan daha təsirli oldu.

Fins.az xəbər verir ki, çərşənbə günü Uoll-strit bankları ABŞ-ın əmək bazarı ilə bağlı əsas məlumatları öz terminallarında yarım saat gecikmə ilə gördülər. Lakin bəziləri əvvəlcədən nazirliyə zəng edərək lazımi rəqəmləri çox daha tez öyrənməyi bacardılar.

Ən azı üç banka ABŞ-ın əmək bazarı ilə bağlı əsas məlumatları digərlərindən daha tez əldə etdilər, halbuki Uoll-stritin qalan hissəsi bu məlumatları öz terminallarında yarım saat gecikmə ilə gördü. Məcburi gözləmə dünya maliyyə bazarlarında dalğalanmalara səbəb oldu və bir sıra suallar doğurdu.

Çərşənbə günü Nyu-York vaxtı ilə səhər saat 10-da ABŞ Əmək Statistikası Bürosu (BLS) ölkədə məşğulluqla bağlı yenilənmiş məlumatları təqdim etməli idi. Ancaq bu, baş vermədi.

Bundan sonra Mizuho Financial Group, BNP Paribas və Nomura Holdings şirkətlərinin əməkdaşları sadəcə olaraq idarəyə zəng edərək bütün lazımi rəqəmləri birbaşa əldə etdilər. Bundan dərhal sonra Uoll-stritdə BLS-in makroiqtisadi statistikanı telefonla açıqlamağa başladığı barədə şayiələr yayıldı. Baş verən qarışıqlıq nəticəsində digər maliyyə şirkətləri və Bloomberg News da daxil olmaqla KİV-lər idarəyə telefon zəngləri ilə müraciət etdilər.

Nəhayət, məlumatlar səhər saat 10:30-da dərc ediləndə məlum oldu ki, mart ayına qədər olan 12 ay ərzində ABŞ-ın qeyri-kənd təsərrüfatı sektorunda yaradılan yeni iş yerlərinin sayı ehtimal ki, 818,000 azaldılacaq. Bu, 2009-cu ildən bəri rekord göstəricidir.

Bu gecikmə və BLS-ə zəng edən hər bir şəxsə ayrı-ayrılıqda məlumatların açıqlanması, bu idarənin məlumatların yayılması ilə bağlı bir sıra uğursuz hadisələrdən biridir. Xüsusilə, may ayında BLS istehlak qiymətləri indeksinə dair məlumatları səhvən rəsmi buraxılışdan təxminən 30 dəqiqə əvvəl öz saytında yayımlamışdı.

Bir ay əvvəl isə məlum olmuşdu ki, BLS iqtisadçısı JPMorgan Chase və BlackRock kimi Uoll-stritin iri firmalarının müxtəlif inflyasiya rəqəmləri ilə bağlı məlumatların təfərrüatları barədə çoxsaylı sorğularına ətraflı cavab vermişdi. Bu da idarənin iş təcrübələrinə dair suallar yaratmışdı.

Bir vaxtlar ABŞ-ın əsas makroiqtisadi statistikası Bloomberg də daxil olmaqla akkreditə olunmuş xəbər agentliklərinin ciddi nəzarəti altında təqdim olunurdu, bu agentliklər müəyyən edilmiş vaxtda məlumatları öz xəbər lentlərində dərc edirdilər. Lakin pandemiya zamanı bu təcrübədən imtina edildi və hökumət idarələri sadəcə məlumatları internetdə yerləşdirməyə başladılar, bu metodun daha ədalətli olduğunu hesab etdilər. Beləliklə, hər kəs lazımi rəqəmləri eyni anda, hətta Bloomberg kimi bahalı peşəkar terminalların istifadəçilərindən daha tez görə bilər.

Çərşənbə günü BLS-in saytında məlumatlar təyin edilmiş vaxtda görünmədikdə, BNP Paribas-da baş ABŞ iqtisadçısı olan Yelena Şulyateva idarənin qaynar xəttinə bir neçə dəfə zəng vurdu və ona lazım olan rəqəmlər barədə məlumat verildi.

Mizuho-nun baş ABŞ iqtisadçısı Stiven Rikkyuto da eyni addımı atdı.

Vüqar Bağırov
Fins.az