"Fitch Ratings" Türkiyənin kredit reytinqini "B"dən "B+"-a, reytinq proqnozunu isə "stabil"dən "müsbət"ə yüksəldib.

Fins.az xəbər verir ki, reytinqin yüksəldilməsi 2023-cü ilin iyun ayından həyata keçirilən siyasətlərin, o cümlədən pul siyasətinin sərtləşdirilməsinin, makroiqtisadi və xarici zəifliklərin azaldılmasının effektivliyini əks etdirir.

Açıqlamada, müsbət proqnozun Fitch-in Türkiyənin ümumi makroiqtisadi siyasət mövqeyinin inflyasiyadakı əhəmiyyətli azalma ilə uyğunlaşacağına dair gözləntilərini əks etdirdiyi və cari əməliyyatlar açığının aşağı düşməsi və daha güclü likvidlik buferləri baxımından xarici zəifliklərin azalmağa davam edəcəyi ifadə edildi.

Hesabatda inflyasiya gözləntilərinin azaldığı və xarici likvidlik risklərinin azaldığı bildirilib. 2024-cü ildə inflyasiyanın orta hesabla 58 faiz, ilin sonunda isə 40 faiz olacağı təxmin edilir.

2024-cü ilin birinci rübündən sonra daxili tələb və şəxsi istehlaka daha güclü təsir göstərəcək sərt siyasət qarışığının nisbətən zəif xarici tələblə birləşərək bu il artımın 2,8 faizə qədər yavaşlamasına səbəb olacağı bildirilib. 2025-ci il üçün gözlənti 3,1 faiz idi.

Qurum həmçinin yerli seçkilərin nəticələrinin siyasət dəyişikliyinə səbəb olmayacağını proqnozlaşdırıb.

Fitch sonuncu dəfə 2023-cü il sentyabrın 8-də proqnozu mənfidən stabilə dəyişib. Fitch təqviminə görə, Türkiyə ilə bağlı növbəti qiymətləndirmənin sentyabrın 6-da verilməsi planlaşdırılır.

Günel Məlikzadə
Fins.az