Nazirlər Kabinetinin apardığı hesablamalara görə, iyun ayında qüvvəyə minməsi planlaşdırılan əmək haqqı artımları və vergi endirimləri də daxil olmaqla, adambaşına düşən gəlir 3,8 faiz artaraq hökumətin inflyasiya proqnozunu 2,5 faiz üstələyəcək.

Fins.az Bloomberg-ə istinadən xəbər verir ki, hökumət vergi tədbirlərinin 4 trilyon yen dəyərində olacağını və ümumi gəlir artımına 1,3 faiz bəndi töhfə verəcəyini təxmin edir. Bu o deməkdir ki, fiskal stimul olmadan gəlir artımı gələn il inflyasiya ilə eyni səviyyədə olacaq.

Hökumət sonuncu dəfə 2021-ci ilin aprelindən başlayaraq maliyyə ili üçün gəlir artımının inflyasiyadan yuxarı olacağını proqnozlaşdırmışdı və 0,1 faizlik qiymət artımına cavab olaraq gəlirlərin 1,9 faiz artacağını proqnozlaşdırmışdı.

Nazirlər Kabinetinin hesabatına görə, real gəlirlərin artması iqtisadiyyatın deflyasiyadan çıxması ilə yeni mərhələyə keçmək şansını ifadə edir və iqtisadi artımın əsas mühərriki şəxsi istehlak və kapital qoyuluşu kimi daxili tələb amillərinə keçəcək.

Hesabatda cari maliyyə ilində gəlirlərin 2,4 faiz artacağı və ümumi inflyasiyanın 3 faizlik tempindən geri qalacağı təxmin edilir. Hesabatda bildirilir ki, əmtəə qiymətləri gələn il üçün proqnozlara qeyri-müəyyənlik əlavə edən amillər sırasındadır.

Günel Məlikzadə
Fins.az