Dayanıqlı maliyyələşdirmə üzərində işləyən qeyri-hökumət təşkilatı ShareAction tərəfindən hazırlanan hesabata görə, Avropanın 20 ən böyük bankı ESG kimi tanınan ətraf mühit, sosial və idarəetmə meyarlarına uyğun olaraq maliyyələşdirmə hədəflərini yerinə yetirə bilməyib. 

Fins.az ShareAction tərəfindən aparılan yeni araşdırmaya istinadən xəbər verir ki, Avropa banklarının yaşıl maliyyələşdirmə hədəfləri lazım olandan çox geri qalır.

Avropa İttifaqı, Böyük Britaniya, İsveçrə və Norveçdəki 20 ən böyük kredit bankının yaşıl maliyyələşdirmə hədəflərini araşdıran Böyük Britaniyada yerləşən qeyri-kommersiya təşkilatının təhlili “hədəflər və açıqlamaların məqsədə uyğun olmadığını və aldadıcı iddialara səbəb ola biləcəyini” aşkar edib. 

ShareAction, araşdırdığı bankların əsasən 2050-ci ilə qədər xalis sıfır emissiyaya necə real şəkildə nail olacaqlarını “nümayiş etdirə bilməyən” yaşıl maliyyə hədəflərinə malik olduğunu müəyyən etdi. Təşkilat həmçinin sənayeni yaşıl öhdəliklərin əsaslandığı ölçüləri izah edən metodologiyaları dərc etmədiyinə görə tənqid etdi.

Günel Məlikzadə
Fins.az