Azərbaycan Mərkəzi Bankı maliyyə sektorunun inkişafı ilə bağlı strategiya üzərində işləri tamamlamaq üzrədir.

Fins.az xəbər verir ki, bunu qurumun Baş direktoru Fərid Osmanov Bakıda “Etibarlı, təhlükəsiz və dayanıqlı bankçılıq” mövzusunda keçirilən VII Beynəlxalq Bankçılıq Forumunda (“IBF-2023”) bildirib.

AMB rəsmisinin sözlərinə görə, noyabrın 9-dan ölkədə "Ödəniş xidmətləri və ödəniş sistemləri haqqında" qanun qüvvəyə minəcək və bundan sonra maliyyə bazarlarında ödəniş effektivliyinin formalaşdırılması istiqamətində zəruri və fundamental tədbirlərin görülməsinə başlanılacaq:

"Strateji hədəfimiz növbəti dövr ərzində açıq bankçılıq konsepsiyasının formalaşdırılması, açıq bankçılıqdan açıq maliyyəyə keçidin sürətləndirilməsidir. Bu keçid bizə imkan verəcək ki, bank sektoru ilə yanaşı sığorta sektoru və kapital bazarları sahəsində də açıq məlumatların paylanması imkanlarını təşviq edək".

Fuad Mədətov
Fins.az