Anar Mirzəyev “Rabitəbank” ASC-nin İnsan Resursları Departamentinin direktoru vəzifəsinə işə qəbul edilib.
Fins.az xəbər verir ki, A.Mirzəyev 2009-2010-cu illərdə əmək fəaliyyətinə Kaspian Marin Konstrakşında Kadr işləri üzrə mütəxəssis olaraq başlayıb.
Daha sonra 2011-2012-ci il tarixlərində Azərbaycan Respublikası Sənaye və Energetika Nazirliyində Kadrlar və sosial siyasət şöbəsində məsləhətçi, 2012-2013-cü il tarixlərində Moody İnternational (BP)-da Dövlət orqanları ilə əlaqələr şöbəsində Torpaq işləri üzrə koordinator, 2013-2016-ci il tarixlərində AR Prezidenti yanında Dövlət Qulluğu Məsələləri üzrə Komissiyada İnsan resurslarının idarəedilməsi və dövlət qulluğuna kadrların seçilməsi üzrə, 2017-2019-cu il tarixlərində AR Vergilər Nazirliyinin Tədris Mərkəzində İqtisadiyyat və menecment kafedrasında baş müəllim-layihələrin idarə edilməsi qrupunun rəhbəri, 2019-cu il tarixində AR Maliyyə Bazarlarına Nəzarət Palatasında İnsan resursları və karyera inkişafı idarəsinin rəisi, 2020-ci ildə Dövlət Sosial Müdafiə Fondunun Maliyyə və Mühasibatlıq üzrə Mərkəzi filialında İnsan resursları şöbəsinin müdiri və 2020-ci il tarixindən isə TƏBİB-də ( Tibbi Ərazi Bölmələrini İdarəetmə Birliyi) Təlim və karyera planlaması şöbəsinin müdiri vəzifəsində çalışmışdır. Eyni zamanda Azərbaycan Dövlət İqtisad Universitetində “Business Schooll”da İnsan resurslarının idarə edilməsi mövzuları üzrə müəllim kimi fəaliyyət də göstərir.
Qeyd edək ki, A. Mirzəyev Bakı Dövlət Universitetində (BDU) Sosial elmlər və psixologiya fakültəsinin politologiya ixtisası və Azərbaycan Turizm və Menecment Universitetində Maliyyə üzrə bakalavr təhsili, Azərbaycan Respublikasının Prezidenti yanında Dövlət İdarəçilik Akademiyasında Azərbaycanda siyasi proseslər üzrə isə magistr təhsili almışdır. Həmçinin, Polşa və Cənubi Koreya Respublikasının müxtəlif qurumlarında İnsan resurslarının idarə edilməsi üzrə təcrübə keçmiş və 2015-ci il tarixində ABŞ Dövlət Katibliyinin “Professional Fellowship” təqaüd proqramı üzrə məzun olmuşdur. Əlavə olaraq, Macarıstan və Türkiyədə “Dövlət orqanlarında insan resurslarının idarə edilməsi sistemi”, Almaniya, Latviya və Litvada “Təlim və inkişaf strategiyası” və “Xidməti fəaliyyətinin qiymətləndirilməsi” və son olaraq İSO 9001:2015 Beynəlxalq standartı üzrə “Daxili auditor” təlim kurslarında iştirak edib.