Rəqəmsal İnkişaf və Nəqliyyat Nazirliyinin tabeliyində fəaliyyət göstərən “AzInTelecom” MMC-nin yaratdığı SİMA – bulud əsaslı yeni nəsil rəqəmsal imzanın tərəfdaş qurumların sistemlərinə inteqrasiya prosesi davam edir. Bank olmayan kredit təşkilatı (BOKT) “Embafinans” QSC SİMA-nın növbəti tərəfdaşı olub. Bundan sonra BOKT “Embafinans” QSC-nin müştəriləri yeni nəsil rəqəmsal imzanın imkanlarından yararlanaraq kredit əldə edə biləcəklər. Kredit üçün BOKT “Embafinans” QSC-yə müraciət edən və müsbət cavab alan şəxslər sənədlərin imzalanmasını “SİMA” vasitəsilə məsafədən və operativ həyata keçirə biləcəklər.

SİMA vasitəsilə gələcəkdə digər BOKT-ların məhsullarından da yararlanmaq mümkün olacaq. Vətəndaşlar yeni nəsil rəqəmsal imzadan istifadə edərək başqa sahələr üzrə də elektron xidmətlərdən yararlana bilərlər. Bunlara rəqəmsal dövlət, bank, sığorta, mobil operatorlar, TV və internet provayderləri, elektronika, məişət, bir sözlə, imza tətbiq olunan bütün sahələr daxildir.

Yeni nəsil rəqəmsal imzanın həm vətəndaşlar, həm də xidmət təklif edənlər üçün maliyyə xərclərinin azaldılması və vaxt itkisinin qarşısının alınması kimi bir sıra üstünlükləri var. Bundan əlavə, SİMA-nın istənilən sistemə inteqrasiya oluna bilməsi, eləcə də avtomatlaşdırma istifadəçilər üçün sürətli və istənilən sayda imzalama imkanı da qazandırır.

İmzanı əldə etmək üçün SİMA tətbiqini mobil cihaza yükləmək və bir dəfə qeydiyyatdan keçmək kifayətdir. Rəqəmsal xidmətlərə əlçatanlığı artıran SİMA-nın ölkəmizdə biznes proseslərini sürətləndirəcəyi gözlənilir.

SİMA ilə bağlı daha ətraflı məlumatı rəqəmsal imzanın rəsmi saytından və “157” Zəng Mərkəzi ilə əlaqə saxlayaraq əldə etmək olar.