Tesla, satışların azalması və artan rəqabət səbəbindən qlobal işçi qüvvəsinin 10 faizindən çoxunu işdən çıxarmaq planının bir hissəsi olaraq Nevada ştatının Sparks şəhərindəki fabrikində 693 işçisini işdən çıxaracaq.

Fins.az xəbər verir ki, bildiriş bu həftənin əvvəlində Nevada Məşğulluq, Təlim və Reabilitasiya Departamentinə təqdim edilib. ABŞ əmək qanunvericiliyi 100 və ya daha çox işçisi olan şirkətlərin kütləvi ixtisarlar barədə səlahiyyətlilərə 60 gün əvvəl məlumat verməsini tələb edir.

Tesla bu ayın əvvəlində Texas və Kaliforniyada 6020 işçini işdən çıxaracağını açıqlayıb. ABŞ tənzimləyicilərinə təqdim edilən sənədə görə, şirkətin qlobal işçi sayı 2023-cü ilin sonunda 140,000-dən çox olub.

Günel Məlikzadə
Fins.az