Artıq ölkədə şəxsi taksi fəaliyyəti ilə məşğul olanlarla yanaşı, bu işlə məşğul olan şirkətlər də kifayət qədərdir.  

Fins.az xəbər verir ki, bəzən daha çox müştəri qazanmaq üçün bu şirkətlər fərqli qiymətlər təklif edirlər. Ancaq artıq Bakı taksilərində vahid qiymət tətbiq olunacaq. Bir müddətdir ki, ölkədə fəaliyyət göstərən bütün taksi xidmətlərinin vahid tarifdə fəaliyyət göstərəcəyi haqqında müzakirələr gedir.  Bu barədə Bakutv məlumat yayıb

Taksi fəaliyyətindəki pərakəndəliyə son qoymaq məqsədi ilə nəzərdə tutulan gecə və gündüz tarifi üçün taksometrlər qoyulacaq və onlardakı tətbiqetmələr vasitəsi ilə taksilərə nəzarət etmək mümkün olacaq. 

Bundan razı qalanlarla yanaşı, narazı olanlar da var. Sürücülər deyir ki, şirkət taksiləri Pirşağıya üç manata aparır. Ancaq “Koroğlu” metrostansiyası yaxınlığındakı taksilər iki manata aparır. Gecə ayrı qiymətin tətbiq olunması düzgün deyil. Məsafə eyni məsafədir. Bakıda indi kasib təbəqə hamısı ən ucuz taksi xidmətindən istifadə edir.  

Təklifə qarşı çıxanlar iddia edirlər ki, vahid qiymət siyasətinin tətbiq edilməsi, bazar iqtisadiyyatının qanunlarına uyğun deyil. Onların fikrincə, belə bir qərar taksi xidmətindəki sağlam rəqabət mühitinə xələl gətirəcək, vətəndaşlara ucuz xidmət göstərən taksilərin işinə maneə yaradacaq.  

Ekspert Azər Allahverənovun sözlərinə görə, Azərbaycanda təxminən 10 il bundan öncə taksidən istifadədə vahid tarif müəyyən olunsa da, sonradan bu, müxtəlif mülahizələrə yol açması, gediş haqqına nəzarətin mümkünsüzlüyü və digər səbəblərdən qüvvədən düşüb. Çünki taksi kimi fəaliyyət göstərən avtomobillərin komfortluğu, təhlükəsizlik səviyyəsi müxtəlifdir. Müştəri kimi taksi xidmətindən istifadə edənin də seçimindən çox şey asılıdır. Misal üçün, müştəri müasir tələblərə cavab verən, rahat, yaxud da sovet dövründən qalma, yalnız köhnə standartlara cavab verən avtomobilin taksi xidmətindən yararlana bilər. Bu, müştərinin öz seçimidir. Bu kimi bir sıra səbəblərdən taksi xidməti sistemində vahid qiymətin tətbiqinin özünü nə qədər doğruldacağı sual altındadır.  

Ekspert bildirir ki, elə bir təklif var ki, gecə və günduz fərqli qiymətlər tətbiq ediləcək. Çünki elə indi də bəzən pik saatlarda sürücülər tıxaca görə sifarişdən imtina edir. Ona görə axşam saatlarında qiyməti artırmaq məcburiyyətində qalırlar. Əslində bu proses indi də var. Şəxsi taksi xidməti göstərən standartlara cavab verdikdən sonra qeydiyyatdan keçib fərqlənmə nişanı ala biləcəksə, yalnız onların avtomobillərində taksometrlər quraşdırılacaq, kilometraja görə də qiymət tətbiq ediləcək.