Son illərdə pivə ilə tanınan Belçika, şərabçılıq sahəsində də böyük irəliləyişlər əldə edir.

Fins.az xəbər verir ki, 2023-cü ildə ölkədə şərab istehsalı rekord həddə çataraq 3,4 milyon litr olmuşdur ki, bu da əvvəlki illə müqayisədə 13% artım deməkdir. Ölkədə şərab istehsalçıları və üzüm sortlarının sayı da sürətlə artır, Belçikanın müxtəlif regionları şərab istehsalı mərkəzlərinə çevrilir.

İqlim dəyişikliyi şərabçılığın inkişafında həm müsbət, həm də mənfi təsirlərə malikdir. İstilik artışı üzüm yetişməsinə müsbət təsir göstərsə də, ekstremal hava şəraiti, daşqınlar və yaz şaxtaları məhsuldarlığa zərər vurma riski yaradır. Belçikalı şərabçılar bu çətinlikləri aşmaq üçün qədim metodlara geri dönərək üzüm bağlarını daha davamlı edir.

Gələcəkdə Belçikada şərabçılıq sahəsinin daha da böyüyəcəyi proqnozlaşdırılır. Mütəxəssislər hesab edirlər ki, 2050-ci illərdə ölkə şərab istehsalında qızıl dövrə qədəm qoyacaq və üzüm bağlarının sahəsi hazırkı 900 hektardan 10 min hektara qədər artacaq.