Azərbaycan və Özbəkistan arasında kənd təsərrüfatı sahəsində əməkdaşlığa həsr olunmuş görüş keçirilib.

Fins.az xəbər verir ki, görüşdə kənd təsərrüfatı nazirinin müavini Elçin Zeynalov, Özbəkistan Respublikası Prezidentinin müşavirinin müavini, Özbəkistan Respublikası Prezident Administrasiyası yanında İqtisadi Tədqiqatlar və İslahatlar Mərkəzinin direktoru Obid Hakimov və iki ölkənin müvafiq strukturlarının nümayəndələri iştirak ediblər.

Görüşdə iki ölkə arasında aqrar sahədə əməkdaşlığın mövcud vəziyyəti, gələcək əməkdaşlıq perspektivləri ətraflı müzakirə olunub.

Nazir müavini Elçin Zeynalov bildirib ki, ölkələrimiz arasında bütün sahələrdə əməkdaşlıq dinamik inkişaf edir. Azərbaycanın Özbəkistanla aqrar sahədə əməkdaşlığı genişləndirməkdə maraqlı olduğunu deyən nazir müavini kənd təsərrüfatının bütün istiqamətləri üzrə geniş əməkdaşlıq potensialının olduğunu bildirib.

Səmimi qəbula görə təşəkkür edən Obid Hakimov əməkdaşlığın gücləndirilməsinin əhəmiyyətinə toxunub, aqrar potensialdan istifadə edərək kənd təsərrüfatı sahəsində əlaqələrin genişləndirilməsinin vacib olduğunu qeyd edib.

Görüşdə Azərbaycan ilə Özbəkistan arasında kənd təsərrüfatı və qida məhsullarının ticarət dövriyyəsinin artırılması, kənd təsərrüfatı sahəsində ən müasir texnologiyaların transferi, aqrar sektorda elmi-tədqiqat və təhsil sahələrində təcrübə proqramlarının həyata keçirilməsi, kənd təsərrüfatının rəqəmsallaşdırılması, aqrar sığorta mexanizminin tətbiqinə dair təcrübə mübadiləsinin aparılması və digər məsələlər müzakirə olunub.

Qeyd olunub ki, Azərbaycan və Özbəkistan iqtisadi və ticari əməkdaşlığın gücləndirilməsi istiqamətində bütün təşəbbüsləri dəstəkləyir. Tərəflər aqrar sahə üzrə ixtisaslaşmış ali təhsil müəssisələri, elmi tədqiqat institutları arasında əməkdaşlığı genişləndirmək barədə də fikir mübadiləsi aparıblar.