SP Global Platts bildirir ki, 2024-cü ildə Çinə buğda idxalı azala bilər, çünki taxıl daşınmasının ləğvi və onların gecikmələri tələbatın azalması ilə bağlı narahatlıqları artırır.

Fins.az xəbər verir ki, hazırda bazar iştirakçıları 2024-cü ildə ÇXR-ə buğda idxalının bu il 12-15 milyon ton olan əvvəlki təxminlərlə müqayisədə azalacağını və potensial olaraq 2023-cü ilin nəticələrindən (11,88 milyon ton) aşağı düşəcəyini gözləyirlər.

Xatırladaq ki, Avstraliya və Kanada buğdasının bir çox satıcıdan Çinə daşınması birinci rübdən başlayaraq ikinci və üçüncü rüblərə təxirə salınıb, bir sıra ticarət mənbələri bildiriblər. Fevral və mart-may aylarında Kanada WRS buğdasının bir neçə tədarükü də gecikdi və USDA təxminən 500.000 ton ABŞ SRW buğdasının ixrac satışını ləğv etdiyini bildirdi.

Bundan əlavə, qlobal buğda qiymətlərinin aşağı düşməsinin Fransanın Çinə taxıl daşınmasının potensial ləğvi ehtimalını artıracağı gözlənilir. Belə ki, britaniyalı treyderlərin fikrincə, çinli alıcıların bir neçə ay əvvəl müqavilə bağlanmış fransız buğdasının bəzi partiyalarının qiymətinə yenidən baxmaq istəməsi ehtimalı var, lakin bazar hələ də defolt üçün heç bir müraciət almayıb. Fransanın yeni məhsul buğdasının iyul ayında bazara çıxması və buğda ehtiyatlarının mövcud səviyyəsini nəzərə alaraq, treyderlər ixrac satışlarının ləğv edilməsinə icazə verməkdən çəkinə bilər.

Onu da qeyd etmək lazımdır ki, gözlənilməz mənfi hava hadisələri olmadıqda, Çin 2024-cü ildə daha yüksək keyfiyyətli buğda məhsulu yığa bilər ki, bu da buğda idxalına ehtiyacı azalda bilər.

Günel Məlikzadə
Fins.az