21-22 iyun tarixlərində FAO-Azərbaycan Tərəfdaşlıq Proqramı “Aqrar sahədə qadınların iqtisadi güclərinin artırılması" layihəsi çərçivəsində kənd təsərrüfatı ilə məşğul olan qadınlarla görüşlər keçirilib. Görüşlər qeyd olunan tarixlərdə Gədəbəy, Ağstafa və Tovuz rayonlarında baş tutub.

Görüşlərdə qadın fermerlər layihə çərçivəsində göstərilən dəstəkdən necə yararlandıqlarını vurğulayıblar. Daha sonra fermerlərin təklifləri dinlənilərək layihənin növbəti mərhələlərində göstəriləcək dəstəklər müzakirə olunub.

21 iyun Gədəbəy rayonunda keçirilən tədbirdə Gədəbəy rayon İcra Hakimiyyətinin başçısı İbrahim Mustafayev, AKİA-nın sədr müavini Leyla Məmmədova, AKİA Beynəlxalq təşkilatlar və maliyyə qurumları ilə əməkdaşlıq sektorunun müdiri Teymur Nağıbəyli, FAO-Azərbaycan Tərəfdaşlıq Proqramının rəhbəri Namiq Məmmədov və layihə rəhbəri Flora Poladova iştirak edib. Görüşdə layihənin bölgədə fəaliyyətinin genişləndirilməsi və rayon ərazisində kənd təsərrüfatının inkişaf etdirilməsinə dair atılacaq addımlar müzakirə olunub.

Qeyd edək ki, layihə Azərbaycanın 12 rayonunda (Qazax, Ağstafa, Tovuz, Ağdam, Tərtər, Gədəbəy, Şamaxı, İsmayıllı, Şəki,  Qax, Zaqatala, Balakən) həyata keçirilir və hazırda 250-yə yaxın qadın fermer bu layihədən yararlanır.  Layihənin əsas məqsədi kənd qadınlarına innovativ texnologiyalar və bazara çıxış sahələrində texniki bilik və bacarıqlarını artırmaqda dəstək vermək, eyni zamanda iqtisadi imkanlara bərabər çıxışı əldə etmək, həmçinin kiçik təsərrüfat sahələrini inkişaf etdirərək ərzaq təhlükəsizliyini yaxşılaşdırmaqdır.

FAO-Azərbaycan Tərəfdaşlıq Proqramı çərçivəsində həyata keçirilən layihə BMT-nin Ərzaq və Kənd Təsərrüfatı Təşkilatı (FAO) və Kənd Təsərrüfatı Nazirliyi yanında Aqrar Kredit və İnkişaf Agentliyi (AKİA) ilə birgə icra olunur.